दशैंको आठौं दिन महागौरी देवीको पुजा गरिन्छ, देशभर महाअष्टमीको रौनक

काठमाडौं, असोज २६ –बडादसैंको आठौँ दिन आज घरघरमा शक्तिस्वरुपा देवी दुर्गाभवानीको पूजाअर्चना गरी महाअष्टमी पर्व मनाइँदै छ ।

यस उपलक्ष्यमा आज दसैँघर र कोतलगायत विभिन्न शक्तिपीठमा बलिसहित पूजा, दुर्गा सप्तशती पाठ तथा पुटित भइरहेको छ ।

उपत्यकाभित्रका शक्तिपीठहरु दक्षिणकाली, गुह्येश्वरी, मैतीदेवी, कालिकास्थान, नक्साल भगवती, भद्रकाली, नरदेवी, शोभाभगवती, विजेश्वरी, इन्द्रायणी, रक्तकाली, बज्रयोगिनी, सङ्कटा, बज्रबाराहीलगायतका मन्दिरहरुमा पनि बलि चढाउने र पूजाआराधना गर्नेहरुको बिहान सबेरैदेखि भीड लागेको छ ।

आज दसैँघर तथा जमराकोठामा शक्तिस्वरुपा दुर्गाभवानी, महाकाली, महासरस्वती र महालक्ष्मीको प्रतीकका रुपमा नौ थुप्रा चामल, द्रव्य, जनै, सुपारी, फलफूल र नैवेद्यसहित दुर्गापूजा गर्नुका साथै कलपुर्जा, खड्ग पूजा, हातहतियार र सवारीसाधनलाई सफासुग्घर गरी बलिसहित पूजा गरिन्छ ।

पशुबलि नचढाउनेले जमराकोठामा घिरौँला, कुभिन्डो, मूला आदिको बलि दिई दुर्गाभवानीलाई दही चिउरा, खिर तथा नरिवल चढाई पूजापाठ गर्दछन् ।

नेपाललगायत भारत, भुटान, बङगलादेश, वर्मामा बसेको नेपालीमूलीहरुले पनि बडादसैँ मनाउने प्रचलन रहेको छ । आजका दिन कलकत्ताको कालीको मन्दिर तथा आसामको कामरुकामाक्षमा पनि तान्त्रिक विधिअनुसार पूजा गर्नेहरुले बलि चढाउने परम्परा रहेको संस्कृतीविद् सत्यमोहन जोसीले जानकारी दिए ।

संस्कृतीविद् जोसीले असत्यमाथि सत्यको विजय तथा धामिर्क सहिष्णुता र समन्वय बनाइराख्न दुर्गापूजाको महत्व रहेको उल्लेख गरे ।